Disaster Risk Reduction and Management

Ginulantang ng Bagyong Yolanda ang buong mundo dahil sa naging dulot nito sa Pilipinas. Ayon sa tala, ito ang naging pinakamalakas na bagyo na tumama sa kalupaan sa kasaysayan. Naparalisa ang maraming bahagi ng Kabisayaan, partikular na sa Tacloban at sa ibang bahagi ng Leyte, dulot ng bilyon-bilyung pinsala nito sa agrikulura, imprastraktura, at mga industriya. Higit pa rito, libo-libong tao ang nawalan ng buhay, at milyon-milyong tao ang nasiraan ng pamumuhay at ng ikinabubuhay.

Ilanga raw bago ang Bagyong Yolanda, niyanig naman ng malakas na lindol ang isla ng Bohol. Dahil rito, daan-daang imprastraktura ang gumuho, kabilang na ang mga pinagmamalaking mga simbahan ng Bohal na itinuturing na bilang mga yaman ng bansa. Kabilang rito ang pagkawala ng buhay ng daan-daang mga tao dahil sa pagbagsak ng mga bato at debris.

Sa loob lamang ng mahigit-kumulang dalawang buwan, dalawang malalakas na delubyo na ang tumama sa Pilipinas. Idagdag pa ang mga bagyo at kalamidad na tumama sa bansa noong taong iyon. Kung susumahin, di na mabilang ang mga kalamidad na tumama sa Pilipinas dahil sa posisyon nito sa daigdig. Kabilang ang Pilipinas sa tinatawag na Pacific Ring of Fire na madalas yanigin ng lindol at pagputok ng mga bulkan. Kasama rin ang Pilipinas sa mga nasa kanlurang bahagi ng karagatang Pasipiko, kaya’t nasa dalawampung bagyo ang tumatama sa Pilipinas taon-taon. Di pa kabilang ang mga iba-pang kalamidad tulad ng sunog, baha, tsunami, at landslide. At kung susumahin ang mga dulot ng sakunang ito, milyong milyong mga Pilipino ang namatay, at di na mabilang ang halaga ng mga bagay na nasira ng mga ito.

Dahil sa kadalasan ng pagtama ng mga sakuna sa Pilipinas, nararapat lamang na magkaroon ng sapat at wastong kaalaman ang bawat mga mamamayan sa paghahanda para sa pagtama nito. Kaya’t nagpapasalamat ako sapagkat kabilang ako sa mga Tomasinong nagkaroon ng kaalaman sa paghahanda sa mga sakuna sa tulong ng UST NSTP na nagsagawa ng Disaster Risk Reduction and Management Seminar, Workshop, Training at Practicals.

Sa DRRM SeminarxWorkshopxTrainingxPracticals, nagkaroon ako ng kaalaman ukol sa mahahalagang konseptong dapat matalakas sa paghahanda sa mga sakuna. Natutunan ko ang konsepto ng disaster, na siyang tumutukoy sa mga natural na pangyayaring nagdudulot ng pinsalang maaring mas mapalala ng mga kagagawan ng tao. Ang hazards naman ay ang mga bagay o lugar na maaring magdulot ng pinsala, at ang tsansa nito ay ang risk. Ang risk reduction naman ay ang pagpapababa ng posibilidad na magkaroon ng pinsala ang tao.

Kabilang rin sa mga natutunan ko ay ang Capacities, na siyang tumutukoy sa mga kakahayan ng mga mamamayan, at ang vulnerabilities ay ang mga kahinaan. Ang Bibingka approach naman ay ang pagbibigay-daan sa partisipasyon ng mga mamamayan at hindi lamang pamahalaan ang pangangasiwa ng paghahanda sa sakuna; na inihambing sa pagluluto ng bibingka kung saan ang init ay nagmumula sa ibabaw gayun din sa ilalim. At huli, ang kawayan bilang simbolo ng katatagan ng mga Pilipino, sapagkat tulad ng kawayan, ang Pilipino ay yumuyuko sa pananalasa ng hangin, at muling tumatayo pagkatapos nito.

Sa laro namang Bahay-Tao-Bagyo, aking naisip ang kahalagahan ng pagtutulungan at pagdadamayan sa panahon ng kalamidad. Gayun din ang kahalagahan ng kaalaman tungkol sa paunang-lunas at basic life support.

Marahil, nararapat lamang na tugunan ang mga suliraning kaharap ng Pilipinas sa pamamagitan ng pagtutulungan ng pamahalaan at mga mamamayan sapagkat ang malaking bahagi ng kapalaran ng Pilipinas ay nakasalalay sa kahandaan ng mga Pilipino sa mga sakuna. Upang mabawasan ang mga masamang naidudulot ng bagyo, dapat magkaroon ng sapat na kaalaman ang bawat isa.

Sa aming grupo, isinagawa naming ang PCVA workshop sa pamamagitan ng paggawa ng mapa kung saan inalam namin ang mga mapanganib na lugar malapit sa aming tinutuluyan, gayun din ang pinakaligtas na lugar na maaarin naming paglikasan sa panahon ng kalamidad. Sa workshop na ito lamang namin napagtanto na ang maaaring maitulong ng mga lugar na maaaring naming malikasan sa panahon ng sakuna, kaya’t malaking tulong na nakapagsagawa kami ng PCVA workshop.

Sa Barangay 471 naman sa Lungsod ng Maynila, nakapanayam namin ng kagrupo kong si Evienne Cordero si Barangay Executive Officer Reynaldo Mangalad ukol sa paghahandang ginagawa ng barangay sa mga kalamidad. Sapagkat ang mga barangay sa Lungsod ng Maynila ay maliliit lamang, ang paghahanda sa mga sakuna sa mga barangay ay nasa pamamahala ng City Hall. Ang pangunahing gawain ng barangay ay ang koordinasyon at pagbibigay ng impormasyon ukol sa mga polisiya ng City Hall. Gayun pa man, nagsisikap pa rin ang barangay upang tulungan ang mga residente nito sa paghahanda. Halimbawa, sa Metro Manila Earthquake Drill na ginawa kamakailan, nagkaroon ng koordinasyon ang barangay sa City Hall upang magkaroon ang mga residente nito ng pakikiisa sa naturang drill. Sa paghahanda naman sa baha, sapagkat natural na binabaha ang barangay dahil mababa lamang ito, nagkaroon na lamang sila ng patakaran ukol sa basura upang mapabilis ang pagbaba ng baha. Ngunit sa panahon ng mabigat na sakuna na nangangailangan ng paglikas, gumawa sila ng mapa kung saan itinuturong ang Intramuros golf course ang pinakamalapit na ligtas na lugar upang paglikasan.

Brgy. 471 Barangay Hall

CCTV Monitor

Disaster Plan ng Barangay 471

Evacuation Map ng Brgy. 471

Tulad ng mga patakaran sa Disaster and Risk Reduction and Management, nakasalalay din sa City Hall ang mga patakaran sa iba pang mga bagay. Ngunit pagdating sa seguridad, malaki ang kakahayan ng barangay upang mapanatili ang kaligtasan ng mga mamamayan nito. Nagkabit sila ng mga CCTV cameras upang mamonitor ang mga nagaganap sa mga kalye ng barangay, gayun din ang pagpapatrolya ng mga tanod. Kaya’t naipapagmamalaki ng aking nakapanayam na si Barangay Ex-o Mangalad na malaki na ang naibawas sa mga krimen sa barangay.

Marahil, bilang Pilipino, at dahil nalalapit na naman ang halalan, nararapat lamang na pumili tayo ng mga kandaditong nais umupo sa pamahalaan na mayroong malinaw na plataporma ukol sa pagtugon sa mga suliranin ng paghahanda sa seguridad. At bilang mag-aaral ng Agham Pulitika, ang aking maiaambag sa pagtugon sa mga suliraning ito, ay ang pagsasaliksik sa mga kakayahan ng mga barangay, kasama ang pakikilahok ng mga mamamayan, sa paghahanda sa mga kalamidad.

Kung may oras man upang magkaroon ng mas sistematiko at masmalawak na paghahanda sa mga kalamidad, iyon ay ngayon na. Hindi sa susunod pang dekada, hindi sa susunod pang henerasyon – ngayon na. Ngayong nagiging mas mabilis na ang pag-usbong ng teknolohiya, mas nagiging malala ang paghagupit ng kalikasan.

Sa katunayan, ang kakaganap pa lamang na conference sa Paris ukol sa mabilis na pagbabago ng klima of climate change, ito ay may hatid na positibo at negatibong mensahe. Ang negatibong mensage nito ay dumating na tayo sa punto na mas nabibigyan na natin ng kahalagahan ang pananalapi kaysa sa kalikasan. Ngunit ang positibong mensahe nito ay tayong lahat ay nagkakabuklod-buklod upang bawasan ang mga masamang naidudulot ng ating sibilisasyon sa kalikasan.

Mula sa Paris, dapat umabot sa ating mga Pilipino ang mensahe na nararapat na tayong gumawa ng aksyon. Walang ibang mapipinsala sa ating naidudulot ng ating eksploytasyon sa kalikasan kundi tayo rin. Kung lahat tayo ay makikiisa, walang pader ang di-kayang matibag. Sa atin pinagkatiwala ng Panginoon ang lahat ng kanyang mga nilikha, ang dapat lamang nating patunayan ay karapat-dapat tayo sa posisyong ito.